عايشه بقلبين

شوفتي وصلنا لحد فين انتى وانا
قلبك معايا لكن انتى كلك مش هنا
من يوم ماروحتي وغيبتي عني قلت هسيبك
مع انى عارف من ساعتها هفضل حبيبك
بس قلت اسيبك براحتك..تاخدي نصيبك
وأديكي رجعالى ندمانه..عايشه بقلبين
لازم تحتاري واحد منا احنا الاتنين
واللى يحير فيه وفيا..انى احنا اتنين مش غلطانين
في لحظة ضعف حسيتي انى دي نهايه ولابد منها
انك تعيشي مش معايا وتدوري على دنيا تانيه
وروحتي وانا نديت..ومش هنكر بكيت..لكن بكايا كان جوه منى
ممكن اكون غلطان..في الأخر انسان
لازم أسيب اللى يفكر يبعد عني
وأزاي مسكتي ايدي..وانتى لسه معاه؟؟
وكأنك انتى ماسبتنيش وكأنى أنا ماقولتش اه؟؟
لا..لا وألف لا
مش هترجعيلي.. علشان اكونلك ذليل
حياتك لسه معاه..وانا الماضي الجميل
هوه ماخدكيش من حضني
حضنك هوه اللى بعني
وسابني عايش في ويل
سامحيني مش هقدر ارجع
مش انا اللى اكون بديل